This slideshow requires JavaScript.

Þessi varð alveg ótrúlega góður og ALVÖRU.

1 líter mjólk
1 vanillustöng

245 gr eggjarauður
150 gr sykur

100 gr dökkt kakó

500 ml rjómi – þeyttur

300 gr súkkulaðibitar ( dökkt og hvítt – annað hvort eða bæði )

Eggin hrærð með sykrinum það til ljós og létt.
Annað hvort hægt að gera þetta í hrærivél eða bara með þeytara.

Mjólkin hituð að suðu ( samt ekki láta hana sjóða…) ásamt vanillustönginni og síðan bætt varlega saman við eggjablönduna. Passið að gera þetta rólega og setja bara smá í einu, þannig að eggin “scramblist” ekki og verði að eggjahræru.

Síðan er blandan annað hvort sett í pott eða í skál yfir vatnsbað – bara eftir því hversu djörf eða ævintýragjörn þið viljið vera;) Hvort heldur þið gerið, þá er lykilorðið hérna….varlega…

Þetta er svo hitað og hrært allan tímann ( þannig að eggin skramblist ekki…) þar til blandan er nógu þykk til að þekja skeið og hægt er að draga línu eftir skeiðinni, en blandan helst samt í stað.
Kallast “coating consitancy” á ensku. Getið séð mynd af því í þessum pósti hér.
Er ekki viss hvernig það skal þýðast, en ég vona að þið skiljið hvað ég á við:)

Síðan er kakóinu bætt saman við – ég var með mjög dökkt kakó, en ég er viss um að ljóst dugar alveg jafn vel. Annað hvort hægt að sigta það til að það fari ekki í kekki, eða hræra bara hratt og vel saman við blönduna.

Síðan er blandan kæld í amk 3 – 4 tíma og helst yfir nótt.
Hún kólnar fyrr ef þið setjið hana í fremur grunna en stóra skál og hrærið við og við.
Ég hef sjaldan þolinmæði til að bíða yfir nótt, en 3 tímar í grunnri skál eiga að vera nóg.

Þá er rjóminn þeyttur og honum bætt varlega saman við ásamt súkkulaðibitunum.

Allt sett í ísvél og síðan í frysti ef þarf.

Ég held að ég verði annars að fá mér öflugri ísvél – vildi helst hafa eina sem krefðist þess ekki að ísinn þyrfti líka að fara í frystinn…Svo er örugglega hægt að prófa að gera þetta án ísvélar – bara passa að hræra í forminu við og við þannig að þetta verði ekki að klakaköggli!

Alvöru ís – ekki svona jurtafituís eins og fæst víðast hvar og ég skil ekki hvernig er hægt að kalla ítalskan ís….sorrí. Á algjörlega ekkert skilt við alvöru gelato. Þessi á það hins vegar, enda alvöru hráefni.

Þetta var náttúrulega allt of mikið til að fara allt í einu í ísvélina en einhvern veginn finnst mér varla taka því að gera minna í einu. Þetta voru einhverjir 2 – 2,5 lítrar og ég sé ekki fram á að þetta muni skemmast hér í frystinum….

Verði ykkur að góðu!