Það var töluvert eftir af sætu kartöflumúsinni síðan í gær og eins af sósunni góðu sem fór á rifin.

Skrapp í fiskbúð á leiðinni heim og kippti með löngu,
þrátt fyrir að það hljómi alltaf í hausnum á mér að “kaupa ekki fisk á mánudögum”.
Það er kannski í góðu lagi og nokkurn veginn sama hvaða dag fiskur er keyptur hér.

Fiskur er hins vegar ekki eitthvað sem ég myndi panta mér á veitingastað á mánudegi væri ég stödd einhvers staðar annars staðar en í sjávarþorpi og liggur við sæi fiskinn koma að landi.

Mér finnst langa ágætis fiskur.
Hann heldur sér betur í eldun en þorskur, þó svo þorskur sé alltaf góður.

Setti sætu kartöflumúsina í fat, smá smjör yfir og hlynsíróp, nokkrar saxaðar pistasíur og svo smá kanil yfir allt.

Inn í ofn í smástund-bara rétt þannig að hún hitni í gegn og pistasíurnar taki smá lit. Kannski ekki alveg jafn mikinn lit og hér að neðan.

Nokkrar urðu aðeins of dökkar, en það kom ekki að sök:)

Fiskinn penslaði ég svo báðum megin með sósunni góðu og skellti inn í sjóðandi heitan ofn í tæpar 20 mínútur.

Það er nokkuð misjafnt hvað fiskur þarf langan tíma í ofni,
eftir því hversu þykkir bitarnir eru.

Verði ykkur að góðu:)