Túnfiskur.

Ég veit. Ég er oft með túnfisk. En mér finnst hann bara svo góður…

Svo er líka þægilegt að kippa honum úr frystinum að morgni dags og vita að það þarf lítið að spá í hvað verði í matinn. Sérstakega á svona dögum.

Rófur og rauðbeður eru oft til á þessum árstíma og passa vel saman.

Og balsamedik. Það fer í raun fátt annað í þennan rétt. Jú. Smá beikon.

Rófur og rauðbeður skorið fremur smátt og sett í fat, ólivuolía og sjávarsalt yfir allt og inn í vel heitan ofn. Hrært í við og við.

Og túnfiskurinn.

Það er best að þerra hann vel með eldhúspappír, sulla smá balsamediki á hann, salta og pipra og skella honum á vel heita pönnuna. Í þetta sinn steikti ég smá beikon á pönnunni áður,tók það síðan af og steikti túnfiskinn úr beikonfitunni.

Passið ykkur bara að steikja hann bara nógu stutt og á vel heitri pönnu.

Klikkar ekki.

Reyndar eldaði ég ekki einu sinni í kvöld, heldur sonur minn.

Hann ætlar að elda mikið á næstunni skilst mér, þannig að það eru spennandi tímar framundan;)

Ég held að ég verði þarna einhvers staðar á hliðarlínunni til að byrja með, en hver veit nema hann taki bara við í eldhúsinu fljótlega og ég fari að gera eitthvað annað!

Verði ykkur að góðu!