Þetta byrjaði allt á gulrótarbrauði sem ég hafði gert fyrr um daginn….og var hættulega gott…
Því miður er engin uppskrift í þetta sinn – lofa að vigta allt og mæla næst.
Hveiti, ger, gulrætur, grísk jógúrt, volgt vatn, smá mjólk….Allavega!
Blómkálssúpan….
Fjórir fagrir blómkálshausar í smærra lagi sem ég hafði kippt með mér af markaðnum í Mosó á laugardag ásamt þessum smáu en fersku laukum….
Í pottinn fór blómkálið og laukurinn, ólífuolía og sjávarsalt….
Fékk að veltast þar aðeins um en ekki of, þangað til tæpur hálfur líter af mjólk og 800 ml af vatni skelltu sér í pottinn ásamt tveim vænum lárviðarlaufum, slatta af nýrifnu múskati og ögn af hvítum pipar.
Það má vissulega kaupa múskat malað, en það er eitthvað við nýrifið múskat…
Ég geymi það alltaf í glerkrukku í skápnum og þetta pínulitla rifjárn við hliðina sem ég nota bara til að rífa múskat.
Þegar blómkálið var orðið lint, var allt maukað með töfrasprota og þykkt ögn með hveiti og smjöri – sirka 2-3 matskeiðum af hvoru.
Smjörbollan – smjör og hveiti stappað saman með gaffli og bætt í pottinn smátt og smátt, en samt hratt og örugglega svo engir kekkir komi;)
Saltað og kryddað til – smá meiri hvítur pipar, aðeins meira múskat….
Á meðan blómkálið sauð – varð til eggjasalat…
6 harðsoðin egg
4-5 kúfaðar matskeiðar majónes
Börkur af einni sítrónu og ögn af safanum – sirka 2 matskeiðar eða svo
Ögn af sjávarsalti og hvítum pipar
Handfylli af smátt saxaðri steinselju
Og þessi brakandi ferski vorlaukur
Ég notaði allan hvíta hlutann og sirka helming af þeim græna
Það með var allt tilbúið og bara að kalla alla að borðinu!
Sigurveig 